nuol.edu.la



ກອງປະຊຸມສ່ອງແສງປະຈຳເດືອນ 3 ແລະຜ່ານແຜນການປະຈຳເດືອນ 4 ຂອງ ມະຫາວິທະຍາໄລແຫ່ງຊາດ

1491556024 tmp IMG 3046

          ໃນຕອນເຊົ້າ ວັນທີ 6 ເມສາ 2017ນີ້, ທີ່ຫ້ອງປະຊຸມຕຶກສໍານັກງານອະທິການບໍດີ ມະຫາວິທະຍາໄລແຫ່ງຊາດໄດ້ຈັດກອງປະຊຸມສ່ອງແສງປະຈຳເດືອນ ມີນາ(3) ແລະຜ່ານແຜນການເດືອນ ເມສາ(4) ຂອງມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາ, ທ່ານ ສຈ.ປອ. ສົມສີ ຍໍພັນໄຊ ວ່າການແທນອະທິການບໍດີ ມະຫາວິທະຍາໄລແຫ່ງຊາດ, ມີບັນດາທ່ານຮອງອະທິການບໍດີ, ຄະນະບໍດີ, ຫົວໜ້າຫ້ອງການເຂົ້າຮ່ວມຈຳນວນ 36 ທ່ານ.

          ໃນໂອກາດນີ້, ທ່ານ ນາງ ແສງເດືອນ ຫຼ້າຈັນທະບູນ ກໍໄດ້ ຮັບຟັງບົດສະຫຼຸບວຽກງານການເຄື່ອນໄຫວໃນ ເດືອນ ມີນາ ແລະຜ່ານທິດທາງແຜນການໃນເດືອນ ເມສາ. ຈາກຄະນະນໍາ ມະຫາວິທະຍາໄລແຫ່ງຊາດ. ຈາກນັ້ນ ທ່ານ ນາງ ແສງເດືອນ ຫຼ້າຈັນທະບູນ ກໍໄດ້ໃຫ້ກຽດໂອ້ລົມ ຕໍ່ທີ່ປະຊຸມ, ເຊິ່ງທ່ານໄດ້ໂອ້ລົມໃນຫຼາຍດ້ານ ກ່ຽວກັບການສ້າງສາ ແລະຊ່ວຍກັນພັດທະນາວຽກງານການສຶກສາຢູ່ພາຍໃນ ມະຫາວິທະຍາໄລແຫ່ງຊາດ ເປັນຕົ້ນແມ່ນ: ວຽກງານພັດທະນາຊັບພະຍາກອນມະນຸດ, ວຽກງານຄົ້ນຄວ້າວິທະຍາສາດ ໃຫ້ມີຄວາມໂດດເດັ່ນ, ມອບໝາຍໃຫ້ແຕ່ລະຄະນະພາກວິຊາມີສ່ວນຮ່ວມໃນການເຮັດບົດຄົ້ນຄວ້າ ແລະສຳລັບອາຈານທີ່ສອນ ໃນມະຫາວິທະຍາໄລແຫ່ງຊາດ ກໍໃຫ້ມີບົດວິໄຈພາກປະຕິບັດການສິດສອນ ແລະເນື່ອງໃນໂອກາດ ປີໃໝ່ລາວ ພ.ສ 2560 ທີ່ໃກ້ຈະໝູນວຽນມາຄົບຮອບໃນມໍ່ໆນີ້. ທ່ານ ສຈ. ປອ. ສົມສີ ຍໍພັນໄຊ ວ່າການແທນອະທິການບໍດີ ມະຫາວິທະຍາໄລແຫ່ງຊາດ, ໃນນາມຕາງໜ້າ ຄະນະນຳ, ພະນັກງານ, ຄູ-ອາຈານ ກໍໄດ້ກ່າວອວຍພອນ ແກ່ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະກີລາ ຈົ່ງມີແຕ່ສຸຂະພະລານາໄມສົມບູນ ແລະສືບຕໍ່ຊີ້ນໍາໆພາ ມະຫາວິທະຍາໄລແຫ່ງຊາດຕະຫລອດໄປ, ພ້ອມທັງມອບ ກະຕ່າ(ຜັກປອດສານຜິດ) ເຊິ່ງເປັນຜະລິດຕະພັນຈາກນັກສຶກສາ ຄະນະ ກະເສດສາດ ມະຫາວະທະຍາໄລແຫ່ງຊາດ, ປະກອບດ້ວຍພືດຜັກ ຫຼາຍຊະນິດ ທີ່ຜ່ານຂະບວນການປູກໂດຍການໃຊ້ຝຸ່ນຈາກທຳມະຊາດ, ບໍ່ມີການໃຊ້ສານເຄມີ ເພື່ອເປັນຂອງຂວັນອີກດ້ວຍ.        

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກອງປະຊຸມສ່ອງແສງປະຈຳເດືອນ 3 ແລະຜ່ານແຜນການປະຈຳເດືອນ 4 ຂອງ ມະຫາວິທະຍາໄລແຫ່ງຊາດ

ການຮັບສະໝັກ

ທຶນການສຶກສາ