nuol.edu.la



ພິທີປາຖະກະຖາຫວນຄືນມູນເຊື້ອ ຊາວໜຸ່ມ ປະຊາຊົນ ປະຕິວັດລາວ

1491469985 tmp IMG 3037

          ໃນວັນທີ 5 ເມສາ 2017ນີ້, ຄະນະຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດ ໄດ້ຈັດພິທີ ປາຖະກາຖາຫວນຄືນມູນເຊື້ອຂອງ ຄະນະຊາວໜຸ່ມປະຊາຊົນປະຕິວັດລາວ (ຄຊປປລ)ເນື່ອງໃນໂອກາດວັນສ້າງຕັ້ງ ຄະນະຊາວໜຸ່ມປະຊາຊົນປະຕິວັດລາວ ຄົບຮອບ 62 ປີ (14 ເມສາ 1955 – 14 ເມສາ 2017) ໂດຍເປັນກຽດເຂົ້າຮ່ວມຂອງສະຫາຍ ປອ. ສໍາລານ ພັນຄະວົງ ເລຂາທິການສູນກາງຊາວໜຸ່ມປະຊາຊົນປະຕິວັດລາວ ຄະນະພັກ, ເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະກີລາ, ສະຫາຍ ນາງ ວິລະວອນ ພັນທະວົງ ຮອງເລຂາ, ປະທານກວດກາ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດ, ຄະນະຊາວໜຸ່ມຮາກຖານສຳນັກງານອະທິການບໍດີ ແລະຮາກຖານອ້ອມຂ້າງ 14 ຮາກຖານ ອ້ອມຂ້າງ ມະຫາວິທະຍາໄລແຫ່ງຊາດ, ມີນ້ອງນ້ອຍເຍົາວະຊົນ ຈາກໂຮງຮຽນປະຖົມສົມບູນສາທິດ ແລະໂຮງຮຽນພອນສະຫວັນ ແລະຊົນເຜົ່າກຽມມະຫາວິທະຍາໄລເຂົ້າຮ່ວມ.

          ຈຸດປະສົງຂອງການຈັດພິທີ ປາຖະກະຖາຫວນຄືນມູນເຊື້ອ ຂອງຄະນະຊາວໜຸ່ມປະຊາຊົນປະຕິວັດລາວ ໃນຄັ້ງນີ້ກໍເພື່ອໃຫ້ ຄະນະນຳ, ສະມາຊິກຊາວໜຸ່ມ ແລະເຍົາວະຊົນ ມະຫາວິທະຍາໄລແຫ່ງຊາດ ເຫັນໄດ້ມູນເຊື້ອອັນພິລະອາດຫານຂອງຄົນຮຸ່ນກ່ອນ ຜູ້ທີ່ມີຜົນງານ ແລະປະກອບສ່ວນເຂົ້າໃນພາລະກິດປົດປ່ອຍ, ປົກປັກຮັກສາ ແລະສ້າງສາພັດທະນາປະເທດຊາດ ໃນໄລຍະຜ່ານມາ ແລະໃນໄລຍະໃໝ່, ເຮັດໃຫ້ຊາວໜຸ່ມ, ເຍົາວະຊົນ ມະຫາວິທະຍາໄລແຫ່ງຊາດ ກຳໄດ້ຜົນງານ, ວິລະກຳອັນຍອດຍິ່ງ, ຄວາມເສຍສະຫຼະ, ຄວາມຮັກຊາດອັນດູດດື່ມ ຂອງສະມາຊິກຊາວໜຸ່ມຮຸ່ນກ່ອນທີ່ມີຕໍ່ປະເທດຊາດ ແລະນຳເອົາໄປເປັນແບບຢ່າງໃນການປະຕິບັດສິດ ແລະພັນທະຂອງຕົນ ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ຕາມທິດສັງຄົມນິຍົມເທື່ອລະກ້າວ, ເປັນການສ້າງຂະບວນການຂໍ່ານັບຮັບຕ້ອນວັນສ້າງຕັ້ງ ຄະນະຊາວໜຸ່ມປະຊາຊົນປະຕິວັດລາວ ຄົບຮອບ 62 ປີ.

          ໂອກາດນີ້, ສະຫາຍ ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ ກໍໄດ້ຂຶ້ນຜ່ານບົດສະຫຼຸບຜົນງານການເຄື່ອນໄຫວ ໄຕມາດທີ I ປະຈຳປີ 2017 ແລະຜ່ານແຜນການເຄື່ອນໄຫວໄຕມາດທີ II ປະຈຳປີ 2017 ຂອງຄະນະຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດວ່າ: ຄະນະຊາວໜຸ່ມ ປະຊາຊົນປະຕິວັດລາວ ມະຫາວິທະຍາໄລແຫ່ງຊາດ ແມ່ນຮາກຖານໜຶ່ງທີ່ຂຶ້ນກັບຄະນະຊາວໜຸ່ມ ກະຊວງສຶກສາທິການ ແລະກີລາ ໂດຍໄດ້ຮັບການຊີ້ນຳໂດຍກົງ ຈາກຄະນະພັກ ມະຫາວິທະຍາໄລແຫ່ງຊາດ, ການເຄື່ອນໄຫວແມ່ນປະຕິບັດຕາມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະຂອງຄະນະຊາວໜຸ່ມປະຊາຊົນປະຕິລັດລາວ ວາງອອກຢ່າງເຂັ້ມງວດ, ມີການຄົ້ນຄວ້າເຊື່ອມຊຶມ ແລະປະຕິບັດຕາມມະຕິກອງປະຊຸມໃຫຍ່ຂອງຜູ້ແທນຊາວໜຸ່ມຂັ້ນເທິງ ເພື່ອເປັນບ່ອນອ້າງອີງໃນການຈັດຕັ້ງປະຕິບັດວຽກງານຕາມພາລະບົດບາດ, ໜ້າທີ່ ແລະຄວາມຮັບຜິດຊອບຂອງຕົນເອງ, ມີຄະນະບໍລິຫານງານທັງໝົດ 13 ສະຫາຍ, ຍິງ 3 ສະຫາຍ, ລວມມີ 14 ຮາກຖານ ປະກອບມີ 76 ໜ່ວຍ, 374 ຈຸ, ມີສະມາຊິກທັງໝົດ 14,422 ສະຫາຍ, ຍິງ 6,534 ສະຫາຍ. ແຜນໃນໄຕມາດທີ II ປະຈຳປີ 2017 ຂອງຄະນະຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດ ແມ່ນສືບຕໍ່ຈັດຕັ້ງ-ເຜີຍແຜ່ລະບຽບ ແລະສຶກສາອົບຮົມແນວຄິດໃຫ້ສະມາຊິກຊາວໜຸ່ມຮາກຖານໃຫ້ໄດ້ຢ່າງໜ້ອຍ 1 ຄັ້ງຕໍ່ປີ, ສືບຕໍ່ຈັດຕັ້ງປະຕິບັດ 5 ຫຼັກມູນ, 3 ລັກສະນະ ຂອງການສຶກສາໃຫ້ປະກົດຜົນເປັນຈິງ, ສູ້ຊົນປະຕິບັດຂໍ້ແຂ່ງຂັນຂອງກະຊວງສຶກສາທິການ ແລະກີລາວາງອອກຄື: “ສອນດີ - ຮຽນເກັ່ງ, ຕ້ານປະກົດການຫຍໍ້ທໍ້, ສ້າງສິ່ງແວດລ້ອມທີ່ດີໃນໂຮງຮຽນ, ສູນສະຖາບັນການສຶກສາ ແລະກີລາ”.

          ໃນໂອກາດຕອນທ້າຍ ສະຫາຍ ນາງ ວິລະວອນ ພັນທະວົງ ຮອງເລຂາ, ປະທານກວດກາ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ກໍໄດ້ກ່າວປາຖະກະຖາ ເລົ່າຄືນມູນເຊື້ອຂອງຊາວໜຸ່ມປະຊາຊົນປະຕິລັດລາວ ເຊິ່ງມີເນື້ອໃນເວົ້າເຖິງຜົນງານອັນພົ້ນເດັ່ນ, ອົງອາດກ້າຫານໃນການຕໍ່ສູ້ກູ້ຊາດ ຕ້ານພວກຄົນບໍ່ດີ ໃນສະໄໝກ່ອນ; ພ້ອມນັ້ນ ຍັງໄດ້ຍົກໃຫ້ເຫັນ ມູນເຊື້ອຂອງຊາວໜຸ່ມໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ໃຫ້ຈະເລີນກ້າວໜ້າຮຸ່ງເຮຶ່ອງສີວິໄລ ແລະອື່ນໆ. ຂະນະດຽວກັນ ທ່ານຍັງໄດ້ຮຽກຮ້ອງມາຍັງບັນດາ ອ້າຍ-ເອື້ອຍນ້ອງຊາວໜຸ່ມໃນຮຸ່ນປັດຈຸບັນ ຈົ່ງເອົາໃຈໃສ່ໃນການສຶກສາຮໍ່າຮຽນ, ຮັກສາໄດ້ວັດທະນະທຳ ຮີດຄອງປະເພນີອັນດີງາມຂອງຊາດລາວ, ພ້ອມທັງອອກແຮງແຂ່ງຂັນກັນສ້າງຜົນງານຕາມຂໍ້ແຂ່ງຂັນ 4 ບຸກຂອງຊາວໜຸ່ມປະຊາຊົນປະຕິວັດລາວ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີປາຖະກະຖາຫວນຄືນມູນເຊື້ອ ຊາວໜຸ່ມ ປະຊາຊົນ ປະຕິວັດລາວ

ການຮັບສະໝັກ

ທຶນການສຶກສາ