nuol.edu.la



ກອງປະຊຸມໂຄງການສ້າງຄວາມເຂັ້ມແຂງເພື່ອການສົ່ງເສີມການພັດທະນາພາກທຸລະກິດ ແລະການລົງທຶນຂອງນັກທຸລະກິດຍີ່ປຸ່ນຢູ່ ສປປ ລາວ

1491379681 tmp IMG 2972

           ໃນຕອນເຊົ້າ ວັນທີ 4 ເມສາ 2017 ນີ້, ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ໄດ້ຈັດກອງປະຊຸມ ໂຄງການສ້າງຄວາມເຂັ້ມແຂງເພື່ອການສົ່ງເສີມການພັດທະນາພາກທຸລະກິດ ແລະການລົງທຶນຂອງນັກທຸລະກິດຍີ່ປຸ່ນຢູ່ ສປປ ລາວ. ໂດຍຜ່ານສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ຄັ້ງທີ 5 ທີ່ຫ້ອງປະຊຸມຕຶກສຳນັກງານອະທິການບໍດີ ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ນາງ ຊາເອດະ ມາກິໂມໂຕະ (Ms. Saeda MAKIMOTO) ຮອງຫົວໜ້າອົງການໄຈກ້າປະຈຳລາວ, ທ່ານ ຮສ. ປອ. ບຸນລ້ວນ ດ້ວງເງິນ ຜູ້ອຳນວຍການສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ພ້ອມດ້ວຍ ແຂກທີ່ຖືກເຊີນ, ຄະນະຮັບຜິດຊອບ ແລະຜູ້ຕາງໜ້າຈາກສະຖານທູດຍີ່ປຸ່ນປະຈຳລາວ ເຂົ້າຮ່ວມ.

          ໂອກາດນີ້, ທ່ານ ຮສ.ປ. ບຸນລ້ວນ ດ້ວງເງິນ ຜູ້ອຳນວຍການສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ໄດ້ຂຶ້ນຜ່ານບົດລາຍງານໂດຍຫຍໍ້ກ່ຽວກັບ ໂຄງການສ້າງຄວາມເຂັ້ມແຂງເພື່ອການສົ່ງເສີມການພັດທະນາພາກທຸລະກິດ ແລະການລົງທຶນຂອງນັກທຸລະກິດຍີ່ປຸ່ນຢູ່ ສປປ ລາວ. ໂດຍຜ່ານສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ໃນໄລຍະ 6 ເດືອນທີ່ຜ່ານມາວ່າ: ແຕ່ເດືອນ ຕຸລາ 2016 ຫາ ເດືອນ ມີນາ 2017, ໄດ້ສືບຕໍ່ດໍາເນີນການປະຕິບັດວຽກງານຕາມແຜນທີ່ວາງໄວ້; ໃນດ້ານການບໍລິຫານທຸລະກິດ ແລະວັດທະນະທຳ, ນອກຈາກນີ້ ຍັງໄດ້ຮ່ວມມືກັບຊ່ຽວຊານຍີ່ປຸ່ນໃນການປັບປຸງການປະຕິບັດວຽກງານໃນໂຄງການດັ່ງກ່າວ, ສືບຕໍ່ຊຸກຍູ້ ແລະສົ່ງເສີມ ຊອກຫາແຫຼ່ງທຶນໃຫ້ພະນັກງານໄດ້ພັດທະນາຕົນເອງໃນການຍົກລະດັບຢູ່ພາຍໃນ ແລະຕ່າງປະເທດ, ມີການຮ່ວມມືກັບອົງການໄຈກ້າ ໃນດ້ານການບໍລິຫານ ແລະການພັດທະນາຫຼັກສູດພາຍໃນສະຖາບັນ ເຊິ່ງໃນນັ້ນ ມີຫຼັກສູດການພັດທະນາການຮຽນ-ການສອນ, ດຳເນີນການສອນຫຼັກສູດບໍລິຫານທຸລະກິດ ແລະພາສາຍີ່ປຸ່ນ, ຈັດກິດຈະກໍາແລກປ່ຽນວັດທະນະທຳ ກັບມະຫາວິທະຍາໄລຈາກປະເທດຍີ່ປຸ່ນ, ເປີດຫຼັກສູດການສອນໃນລະດັບປະລິນຍາໂທ ຮຸ່ນທີ 9 ພາກປົກກະຕິ. ພ້ອມດຽວກັນ ກໍໄດ້ສະເໜີແຜນພັດທະນາ ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນໃນອີກໜຶ່ງປີຂ້າງໜ້າວ່າ: ຈະສືບຕໍ່ພັດທະນາຊັບພະຍາກອນມະນຸດ ເພື່ອສ້າງຄວາມເຂັ້ມແຂງເພື່ອສົ່ງເສີມການພັດທະນາພາກທຸລະກິດ ແລະການລົງທຶນຂອງນັກທຸລະກິດຍີ່ປຸ່ນຢູ່ ສປປ ລາວ, ດຳເນີນແຜນງານ ແລະຫຼັກສູດການສອນ ໂດຍຮ່ວມມືກັບສະພາການຄ້າ, ຮ່ວມມືກັບ ມູນນິທິຮອນດ້າ (Y-E-SAward)ໃນການຄັດເລືອກນັກສຶກສາເພື່ອໃຫ້ທຶນການສຶກສາແກ່ນັກສຶກສາ ມະຫາວິທະຍາໄລແຫ່ງຊາດ ຈຳນວນ 2 ຄົນ ປະຈຳປີ 2018 ແລະຈັດງານສະເຫຼີມສະຫຼອງໂຄງການ YES Award ຄົບຮອບ 10 ປີ, ມີການແລກປ່ຽນຊ່ຽວຊານ ແລະ ວຽກງານການຄົ້ນຄ້ວາ.

          ໃນທ້າຍພິທີ ທ່ານ ນາງ ຊາເອດະ ມາກິໂມໂຕະ (Ms. Saada MAKIMOTO) ຮອງຫົວໜ້າອົງການໄຈກ້າປະຈຳລາວ ໄດ້ມອບເຄື່ອງຄອມພີວເຕີ ຈຳນວນ 41 ຊຸດ ໃຫ້ແກ່ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ເພື່ອນຳໃຊ້ໃນວຽກງານການຮຽນ-ການສອນ ເຊິ່ງຕາງໜ້າຮັບໂດຍ ທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ກອງປະຊຸມໂຄງການສ້າງຄວາມເຂັ້ມແຂງເພື່ອການສົ່ງເສີມການພັດທະນາພາກທຸລະກິດ ແລະການລົງທຶນຂອງນັກທຸລະກິດຍີ່ປຸ່ນຢູ່ ສປປ ລາວ

ການຮັບສະໝັກ

ທຶນການສຶກສາ