nuol.edu.la



ພິທີປິດງານແຂ່ງຂັນກີລາ-ສິລະປະ ປະຈຳສົກຮຽນ 2016-2017 ຂອງ ໂຮງຮຽນ ພອນສະຫວັນ ແລະຊົນເຜົ່າກຽມ ມະຫາວິທະຍາໄລ

1490869681 tmp IMG 2867

          ໃນຕອນບ່າຍ ວັນທີ 29 ມີນາ 2017, ໂຮງຮຽນ ພອນສະຫວັນ ແລະຊົນເຜົ່າກຽມ ມະຫາວິທະຍາໄລແຫ່ງຊາດ ໄດ້ຈັດພິທີປິດງານແຂ່ງຂັນກີລາປະຈຳສົກຮຽນ 2016-2017 ທີ່ສະໂມສອນ ໂຮງຮຽນພອນສະຫວັນ ໂດຍເປັນກຽດເຂົ້າຮ່ວມຂອງທ່ານ ຮສ. ປອ. ຄຳພຸດ ພົມມະສອນ ຜູ້ອຳນວຍການ ໂຮງຮຽນ ພອນສະຫວັນ ແລະຊົນເຜົ່າກຽມ ມະຫາວິທະຍາໄລແຫ່ງຊາດ, ທ່ານຮອງຜູ້ອຳນວຍການ, ພະນັກງານຄູ-ອາຈານ ແລະນ້ອງໆນັກຮຽນແຕ່ຊັ້ນ ມໍ 1 - ຊັ້ນ ມໍ 7 ກໍໄດ້ເຂົ້າຮ່ວມຢ່າງພ້ອມພຽງ.

          ໃນພິທີປິດດັ່ງກ່າວ, ທ່ານ ສີສັງວອນ ຕັນສຸຂັງ ຮອງຜູ້ອຳນວຍການ ໂຮງຮຽນ ພອນສະຫວັນ ແລະຊົນເຜົ່າກຽມ ມະຫາວິທະຍາໄລ ກໍໄດ້ຂຶ້ນກ່າວບົດສະຫຼຸບປິດພິທີການແຂ່ງຂັນວ່າ: ການແຂ່ງຂັນກີລາແມ່ນເລີ່ມແຕ່ ວັນທີ 31 ຕຸລາ 2016 ຫາ 9 ມີນາ 2017, ເຊິ່ງມີນັກສຶກສາເຂົ້າຮ່ວມທັງໝົດ 14 ຫ້ອງ, ຈັດການແຂ່ງຂັນໃນ 3 ປະເພດກີລາຄື: ກີລາບານສົ່ງ(ຍິງ-ຊາຍ), ກີລາກະຕໍ້ ແລະກີລາບານເຕະ. ສຳລັບກະຕິກາຂອງການແຂ່ງຂັນບານສົ່ງ (ຍິງ-ຊາຍ) ແລະ ກີລາກະຕໍ້ ແມ່ນແຂ່ງຂັນແບບເສຍສອງເທື່ອຄັດອອກ ມີທັງໝົດ 13 ທີມ, ສະເພາະກີລາກະຕໍ້ ແມ່ນມີ 14 ທີມ ແລະບານເຕະແມ່ນແຂ່ງຂັນແບບເສຍຄັດອອກ ເຊິ່ງປະກອບມີທີມແຂ່ງຂັນແຕ່ຊັ້ນ ມໍ 4 - ຊັ້ນ ມໍ 7 ຜ່ານແຂ່ງຂັນແມ່ນສາມາດສະຫຼຸບໄດ້ດັ່ງນີ້: ບານສົ່ງຊາຍ ອັນດັບ 1 ໄດ້ແກ່ຫ້ອງ 7/1;​ ບານສົ່ງຍິງ ອັນດັບ 1 ໄດ້ແກ່ຫ້ອງ 7/2; ບານເຕະຊາຍ ອັນດັບ 1 ໄດ້ແກ່ຫ້ອງ 7/1; ກະຕໍ້ຊາຍ ອັນດັບ 1 ໄດ້ແກ່ຫ້ອງ 6/2; ສຳລັບການແຂ່ງຂັນສິລະປະແມ່ນເລີ່ມແຕ່ວັນທີ 22 ກຸມພາ 2017 ຫາ ວັນທີ 7 ມີນາ 2017 ມີ 3 ປະເພດການແຂ່ງຂັນຄື: ຟ້ອນລວມໝູ່ ມີ 11 ທີມ, ຮ້ອງເພງ ມີ 12 ຄົນ, ລໍາພື້ນເມືອງ ມີ 8 ຄົນ, ສໍາລັບການແຂ່ງຂັນແມ່ນແບ່ງເປັນສອງຮອບຄື: ຮອບທີໜຶ່ງ ແມ່ນຈັດຂຶ້ນໃນວັນທີ 22 ກຸມພາ 2017 ແມ່ນຮອບຄັດເລືອກ ແລະຮອບທີ່ສອງ ແມ່ນຈັດຂຶ້ນໃນວັນທີ 7 ມີນາ 2017 ແມ່ນຮອບຊີງຊະນະເລີດ ເຊິ່ງຜົນການແຂ່ງຂັນມີດັ່ງນີ້: ຟ້ອນລວມໝູ່ອັນດັບທີ 1 ໄດ້ແກ່ ຊັ້ນ ມໍ 5; ຮ້ອງເພງ ອັນດັບທີ 1 ໄດ້ແກ່ ນາງ ປາຊົວໃບ ຫ້ອງ 1/2 ໃນບົດເພງ ສົ່ງພອນປີໃໝ່; ລຳພື້ນເມືອງ ອັນດັບທີ 1 ໄດ້ແກ່ ນາງ ຈັນມາລາ ຫ້ອງ 4/1 ໃນບົດເພງ ລຳສີພັນດອນ. ໃນການ ຈັດການແຂ່ງຂັນກີລາ-ສິລະປະໃນຄັ້ງນີ້ແມ່ນເປັນການ ສ້າງຄວາມກະຕືລືລົ້ນໃຫ້ນັກຮຽນໃນການເຂົ້າຮ່ວມການແຂ່ງຂັນ, ສ້າງໃຫ້ນັກຮຽນມີແນວຄິດ ກ້າຄິດ, ກ້າທຳ ແລະກ້າສະແດງອອກໃນທາງສ້າງສັນ ພ້ອມທັງເປັນການປະຕິບັດຕາມ 5 ຫຼັກມູນການສຶກສາ ຂອງກະຊວງສຶກສາທິການ ແລະກີລາໄດ້ວາງອອກ.

          ນອກນັ້ນ ຜູ້ເຂົ້າຮ່ວມຍັງໄດ້ຮັບຊົມລາຍການສະແດງ ສິລະປະ ຂອງນ້ອງໆນັກຮຽນ ເຊິ່ງໄດ້ສ້າງຄວາມມ່ວນຊື່ນ ແລະໜ້າສົນໃຈຢ່າງຍິ່ງໃຫ້ແກ່ຜູ້ທີ່ເຂົ້າຮ່ວມຊົມ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີປິດງານແຂ່ງຂັນກີລາ-ສິລະປະ ປະຈຳສົກຮຽນ 2016-2017 ຂອງ ໂຮງຮຽນ ພອນສະຫວັນ ແລະຊົນເຜົ່າກຽມ ມະຫາວິທະຍາໄລ

ການຮັບສະໝັກ

ທຶນການສຶກສາ