nuol.edu.la



ຂໍ້ກຳນົດທົ່ວໄປ

ມາດຕາ 1

ນັກສຶກສາມະຫາວິທະຍາໄລແຫ່ງຊາດ (ຫຼື ເອີ້ນຫຍໍ້ວ່ານັກສຶກສາ ມຊ) ແມ່ນຜູ້ທີ່ໄດ້ລົງທະບຽນເປັນນັກສຶກສາຢ່າງຖຶກຕ້ອງຕາມລະບຽບການລົງທະບຽນທີ່ ມຊ ໄດ້ກຳນົດໄວ້

ມາດຕາ 2

ເງື່ອນໄຂຂອງຜູ້ທີ່ຈະເປັນນັກສຶກສາ ມຊ ມີ່ດັ່ງນີ້:

  • ມີລະດັບການສຶກສາຈົບມັດທະຍົມຕອນປາຍ ຫຼືທຽບເທົ່າ ຫຼືຈົບວິຊາສະເພາະຊັ້ນອານຸປະລິນຍາ(ຊັ້ນສູງ) ຫຼືຊັ້ນກາງໃນຂະແໜງວິຊາດຽວກັນກັບຂະແໜງວິຊາທີ່ຈະຮຽນຕໍ່ລະດັບປະລິນຍາຕິ ຫຼື ອານຸປະລິນຍາທີ່ ມຊ.
  • ຜ່ານການສອບເສັງເຂົ້າ ມຊ ໄດ້ຄະແນນຕາມຄາດໝາຍທີ່ ມຊ ໄດ້ວາງໄວ້ ຫຼື ໄດ້ຮັບການຄັດເລືອກໃຫ້ມາຮຽນຕາມແຜນແບ່ງປັນກະຊວງສຶກສາທິການ.
  • ມີສຸຂະພາບແຂງແຮງ , ບໍ່ມີພະຍາດຕິດແປດ ແລະ ຮ່າງການຖືກມາດຖານສັດສ່ວນ ທີ່ ຄະນະວິຊາກ່ຽວຂ້ອງໄດ້ກຳນົດໄວ້.
  • ມີຄຸນສົມບັດດີ, ບໍ່ມີປະຫວັດເຄື່ອນໄຫວທີ່ບໍ່ດີເວລາຮຽນ ຫຼືເວລາປະຕິບັດງານໃນກົມກອງທ້ອງຖິ່ນກ່ອນມາຮຽນ.

ມາດຕາ 3

ນັກສຶກສາ ມຊ ທຸກຄົນຕ້ອງມີບັດປະຈຳຕົວນັກສຶກສາເພື່ອນຳໃຊ້ສຳລັບການສຶກສາ ແລະ ເຄື່ອນໄຫວກິດຈະກຳຕ່າງໆໂດຍແມ່ນອະທິການບໍດີເປັນຜູ້ຮັບຮອງ; ບັດປະຈຳຕົວນັກສຶກສາຈະໄດ້ຕໍ່ອາຍຸໃນທຸກໆສົກຮຽນ ໂດຍແມ່ນຄະນະບໍດີເປັນຜູ້ເຊັນຮົບຮອງ

 

ໜ້າທີ່ຂອງນັກສຶກສາ ມຊ

ມາດຕາ 4

  • ຄົ້ນຄວ້າຮໍ່າຮຽນໃຫ້ສຳເລັດການສຶກສາຕາມເນື້ອໃນແລະກຳນົດເວລາຂອງຫຼັກສູດ.
  • ຕັ້ງໜ້າເຝິກຝົນຕົນເອງໃຫ້ມີຄຸນສົມບັດສິນທຳປະຕິບັດກຽມພ້ອມປະຕິບັດໜ້າທີ່ຂອງພົນລະເມືອງດີຂອງຊາດໃນອະນາຄົດ.
  • ຕັ້ງໜ້າປະຕິບັດຂໍ້ກຳນົດກົດລະບຽບ ,ປະການແຈ້ງການ ແລະ ມະຕິຄຳສັ່ງຕ່າງໆ ທີ່ ການຈັດຕັ້ງ ທຸກຂັ້ນຂອງມະຫາວິທະຍາໄລແຫ່ງຊາດວາງອອກ.
  • ເປັນເຈົ້າການເຂົ້າຮ່ວມກິດຈະກຳຕ່າງໆ ທີ່ການຈັດຕັ້ງທຸກຂັ້ນຂອງ ມຊ. ເປັນຜູ້ຈັດຕັ້ງຂຶ້ນ ແລະ ກ່ຽວຂ້ອງກັບຕົນໃຫ້ຄົບຕາມຈຳນວນໜ່ວຍກິດ ຈຶ່ງສາມາດຮັບໃບປະການສະນີຍະບັດຂອງມະຫາວິທະຍາໄລແຫ່ງຊາດ.

ການປະພຶດຂອງນັກສຶກສາ ມຊ

ມາດ​ຕາ 5 :

ນັກ​ສຶກ​ສາ​ ມຊ.​ທຸກ​ຄົນ​ຕ້ອງປະ​ພຶດ​ຕົນ​ເປັນ​ຄົນ​​ສຸ​ພາບ​ຮຽບ​ຮ້ອຍ ເຄົາລົບນັບ​ຖື​ພະ​ນັກ​ງານ, ອາ​ຈານ​ ແລະຖະ​ໜອມ​ຖ່ອມ​ຕົວ​ໃນ​ການ​ພົວ​ພັນຊຶ່ງ​ກັນ ແລະກັນ.

ມາດ​ຕາ 6 :

ນັກ​ສຶກ​ສາ ມຊ. ​ທຸກ​ຄົນ​ຕ້ອງ​​ປົກ​ປັກ​ຮັກ​ສາ​ເຄື່ອງ​ຂອງ​ສ່ວນ​ລວ​ມ, ປົກ​ປັກ​ຮັກ​ສາທຳ​ມະຊາດ ແລະ ສິ່ງ​ແວດ​ລ້ອມ, ຮັກ​ສາ​ຄວາມ​ສະ​ອາດ​ຈົບງາມ​ໃນ​ຫ້ອງ​ຮຽນແລະສະ​ຖານ​ທີ່​ສາ​ທາລະ​ນະ​ຕ່າງໆ ທີ່ ຕົນເຄື່ອນໄຫວຢູ່. ​

ມາດ​ຕາ 7 :

ນັກ​ສຶກ​ສາ​ ມຊ. ທຸກ​ຄົນ​ຕ້ອງ​ປະ​ພຶດ​ຕົນ​​ເປັນ​ພົນ​ລະເມືອງ​ດີ, ເຄົາ​ລົບ​ກົດ​ໝາຍ, ຮັກ​ສາ​ຮີດ​ຄອງ​ປະ​ເພ​ນີ​ອັນ​ດີ​ງາມ​ຂອງ​ຊາດ, ປົກປັກຮັກສາ ແລະ ເສີມ​ຂະ​ຫຍາຍ​ສິລະ​ປະ​ວັດ​ທະ​ນະ​ທ​ຳຂອງ​ຊາດ​, ​ຮັກ​ສາ​ແລະເສີມຂະຫຍາຍມູນ​ເຊື້ອຄວາມ​ສາ​ມັກ​ຄີ​ລະ​ຫວ່າງ​​ເຜົ່າຕ່າງໆໃນວົງຄະນາຍາດແຫ່ງ ຊາດລາວ ແລະ ຄວາມສາມັກຄີສາກົນ.

ມາດ​ຕາ 8 :

ໃນ​ຊົ່ວໂມງຮຽນ ຫຼືໃນການໄປພົວພັນວຽກງານຕາມສະຖານທີ່ລັດຖະການ ແລະໃນ​ພິ​ທີ​ທາງ​ການ​ຕ່າງໆ, ນັກ​ສຶກ​ສາ ມຊ. ທຸກ​ຄົນ​ຕ້ອງ​ນຸ່ງ​ເຄື່ອງ​ແບບ​ນັກ​ສຶກ​ສາຢ່າງຖືກຕ້ອງຕາມລັກ​ສະ​ນະ​ຂອງ ເຄື່ອງແບບນັກ​ສຶກສາ ມຊ. ​ມີ​ຄື:

8.1. ສຳ​ລັບ​ນັກ​ສຶກ​ສາ​ຍິງ:

  • ສິ້ນສີດຳ ຫຼືສີຟ້າແກ່ ມ​ີ​ຕີນກວ້າງ​ 10-15 ຊມ, ບໍ່ລ່າມ ແລະ ບໍ່ເຂີນເກີນຄວນ.
  • ເສື້ອ​ເຊີດສີຂາວ​ແຂນ​ສັ້ນຫຼືຍາວ ແລະມີ​ກາໝາຍ​ຂອງ​ຄະ​ນະ​ວິ​ຊາ​ ຫຍິບ​ຕິດ​ໃສ່ກົກ​ແຂນເສື້ອ ເບື້ອງຊ້າຍ ແລະ ມັດກາລະຫວັດ ທີ່ມີກາໝາຍຂອງຄະນະວິຊາທັງຍິງ ແລະ ຊາຍ.
  • ສາຍ​ແອວ​ໂລ​ຫະ​ແບບ​​ລາວ ຫຼືໜັງ​ສີ​ດຳ ກວ້າງ​ບໍ່ໃຫ້ເກີນ 3 ຊມ, ຫົວ​ສາຍ​ແອວ​ບໍ່​ມີ​ລວດ​ລາຍ​ ເກີນ​ຄວນ.
  • ເກີບຫຸ້ມສົ້ນສີດຳ ຫຼືສີນ້ຳຕານແກ່ ສູງບໍ່ເກີນ 4 ຊມ.
  • ຜົມແຕ່ງແບບເກົ້າຜົມ ຫຼືມັດ ຫຼືເປຍຢ່າງຮຽບຮ້ອຍ.

8.2. ສຳ​ລັບ​ນັກ​ສຶກ​ສາ​ຊາຍ

  • ໂສ້ງ​ຂາ​ຍາວສີດຳ ຫຼືສີຟ້າແກ່ຕັດ​ດ້ວຍ​ແພທຳ​ມະ​ດາ ປາຍຂາໂສ້ງກວ້າງ​ລະ​ຫວ່າງ20-​24ຊມ.
  • ເສື້ອ​ເຊີດສີຂາວ​ແຂນ​ສັ້ນ ຫຼືແຂນ​ຍາວ ແລະມີກາໝາຍຂອງ​ຄະ​ນະ​ວິ​ຊາ​ຫຍິບຕິດໃສ່ກົກ​ແຂນ ເສື້ອເບື້ອງ​ຊ້າຍ​ ແລະ ມັດກາລະຫັວດພ້ອມ.
  • ເກີບ​ໜັງ ຫຼືເກີບແພແບບຫຸ້ມສົ້ນ ສີດຳ ຫຼື ສີນ້ຳຕານແກ່, ບໍ່ມີລວດລາຍເກີນຄວນ .
  • ສາຍ​ແອວ​ໜັງ​ສີ​ດຳ​ກວ້າງ​ບໍ່​ເກີນ 3 ຊມ, ຫົວ​ສາຍ​ແອວ​ບໍ່​ມີ​ລວດ​ລາຍເກີນ​ຄວນ.
  • ຕັດຜົມແບບຈອນໜາທຳມະດາ ແລະຫວີໃຫ້ຈົບງາມ.

ມາດ​ຕາ 9 :

ນັກ​ສຶກ​ສາ​ ມຊ. ​ທຸກ​ຄົນ​ຕ້ອງ​ປະ​ຕິ​ບັດ​ຕົນ​ເປັນ​ນັກ​ສຶກ​ສາ​ທີ່ດີ ແລະມີກິລິຍາມາລະຍາດ ໃນຫອ້ງຮຽນຄື:

  • ຕ້ອງ​ເຂົ້າ​ຫ້ອງ​ຮຽນ​ກ່ອນ​ອາ​ຈານ​ 5 ນາທີເພື່ອກວດກາຈຳນວນພົນ,ເມື່ອອາ​ຈານເຂົ້າ​ຫ້ອງສອນ ນັກສຶກສາທຸກຄົນຕ້ອງ​ລຸກ​ຂຶ້ນ​ທຳ​​ເຄົາ​ລົບອາຈານ ແລະຄະນະຫ້ອງຕ້ອງລາຍງານ ຈຳນວນ ນັກສຶກສາ ທີ່ຂາດຮຽນໃຫ້ອາຈານຮັບຮູ້.
  • ກ່ອນຈະເຂົ້າ​-ອອກຫ້ອງ​ຮຽນ, ຢາກຖາມ ຫຼື ຕອບອາຈານໃນຫ້ອງ​ຮຽນ ​ນັກສຶກສາຕ້ອງ​ຍົກ​ມື​ຂໍ ອະນຸຍາດ​ຈາກ​ອາ​ຈານເສຍກ່ອນ.
  • ຕ້ອງ​ຕັ້ງ​ໃຈ​ຮຽນແລະເຂົ້າຮ່ວມກິດຈະກຳຕ່າງໆທີ່ທາງວິຊາການໄດ້ກຳນົດໄວ້ໃຫ້ຄົບຖ້ວນ.

ຂໍ້ຫ້າມຕ່າງໆ

ມາດ​ຕາ 10 :

ຂໍ້​ຫ້າມສຳລັບ​ນັກ​ສຶກ​ສາ ມຊ.

  • ຫ້າມຈັດ​ຕັ້ງ​ອົງ​ການ​ໃດ​ໜຶ່ງ ຫຼື​ຈັດ​ຕັ້ງ​ຊຸມ​ນຸມ​ໃດ​ໜຶ່ງ​ຂຶ້ນ​ໂດຍບໍ່​ໄດ້​ຮັບການ​ອະ​ນຸມັດ.
  • ຫ້າມນຳ​ເອົາ​ອາ​ວຸດ ​ວັດຖຸລະເບີດ ສານພິດທຸກ​ຊະ​ນິດເຂົ້າມາໃນ ມຊ.
  • ຫ້າມສົມຮູ້ຮ່ວມຄິດ ຫຼື ຊຸກເຊື່ອງເອົາ​ຄົນ​ປະ​ເພດ​ໂຕນ​ຄຸກທີ່ເຈົ້າ​ໜ້າ​ທີ່​ພວມນຳ​ຈັບ, ຄົນປະເພດ​ໂສ​ເພ​ນີ ຫຼືນັກ​ເລງ​ອັນ​ຕະ​ພານເຂົ້າ​ມາໃນ​ ມຊ.
  • ຫ້າມກໍ່ອາລະວາດ ຫຼືສ້າງຄວາມບໍ່ສະຫງົບພາຍໃນ ມຊ ຫຼື ຢູ່ແຫ່ງອື່ນໆ.
  • ຫ້າມ​ທຳ​ລາຍ ຫຼືປອມ​ແປງລາຍເຊັນ ​ຫຼືເອ​ກະ​ສານ​ທາງການຕ່າງໆ.
  • ຫ້າມເສບ ຄ້າຂາຍ ຜະລິດ ຫຼື ມີຢາ​ເສບ​ຕິດປະເພດຕ້ອງຫ້າມ​ໄວ້​ໃນຄອບ​ຄອງ.
  • ຫ້າມນຳໃຊ້ຫຼືເຜີຍແຜ່ອຸປະກອນແລະສື່ລາມົກຕ່າງ ໆ.
  • ຫ້າມພົວພັນເພດກົງກັນຂ້າມທີ່ຜິດຮີດຄອງປະເພນີຂອງລາວໃນມຊ ແລະ ຢູ່ແຫ່ງອື່ນໆ.
  • ຫ້າມທຳຮ້າຍຮ່າງກາຍຜູ້ອື່ນຈົນໄດ້ຮັບບາດເຈັບ.
  • ຫ້າມທຳລາຍຊັບສົມບັດສ່ວນລວມ ຫຼື ສ່ວນບຸກຄົນ.
  • ຫ້າມ​ຂາດຮຽນ​ໂດຍ​ບໍ່​ໄດ້​ຮັບ​ອະ​ນຸ​ຍາດ, ຫ້າມ​​ທຸດ​ຈະ​ລິດ​ໃນ​ການ​ຮຽນ, ການກວດກາ ແລະສອບ​ເສັງ.
  • ຫ້າມຫຼິ້ນການພະນັນທຸກປະເພດ.
  • ຫ້າມລັກໂລບເອົາສິ່ງຂອງສ່ວນລວມ ຫຼືຂອງຜູ້ອື່ນມາເປັນຂອງຕົນເອງ.
  • ຫ້າມດື່ມເຫຼົ້າ ຫຼືສິ່ງມຶນເມົາຕ່າງ ໆ ແລ້ວສ້າງຄວາມເສຍຫາຍ.
  • ຫ້າມນຸ່ງເຄື່ອງແບບນັກສຶກສາໄປເຄື່ອນໄຫວວຽກສ່ວນຕົວຢູ່ຕາມສະຖານທີ່ບັນເທີງຫຼື ສະຖານທີ່ບໍ່ເໝາະສົມອື່ນໆ.
  • ຫ້າມນຳໃຊ້ບັດນັກສຶກສາໄປໃນທາງທີ່ບໍ່ເໝາະສົມ.
  • ຫ້າມລ່ວງລ້ຳສະຖານທີ່ທາງລັດຖະການ ຫຼືຄົ້ນເອກະສານທາງລັດຖະການ.
  • ຫ້າມນັກສຶກສາຊາຍໃສ່​ຕຸ້ມ​ຫູ, ຈົ່ງ​ຜົມ​ຍາວ ຫຼື ຍ້ອມສີຜົມ; ຫ້າມໃສ່ປອກແຄ່ງ ແລະ ຫ້າມແຕ່ງຕົວຜິດເພດສຳລັບນັກສຶກສາ ທັງຍິງ ແລະຊາຍ.
  • ຫ້າມທຳຄວາມເປື້ອນເປິະໃສ່ສະຖານທີ່ສາທາລະນະຕ່າງໆ.
  • ຫ້າມໃຊ້ອຸປະກອນສື່ສານອັນເປັນການລົບກວນການຮຽນ ແລະ ການປະຕິບັດວຽກງານ ທາງລັດຖະການ.
  • ຫ້າມສູບຢາ,ກິນອາຫານ, ດຶ່ມເຄື່ງດຶ່ມຕ່າງໆໃນເວລາຮຽນ,ເວລາປະຊຸມ,ເວລາເຂົ້າຫ້ອງ ສະໝຸດ ແລະ ຢູ່ຕາມບໍລິເວນຫວງຫ້າມຕ່າງໆ.
  • ຫ້າມໃຊ້ວາຈາ ຫຼືກິລິຍາທ່າທີບໍ່ສຸພາບຕໍ່ພະນັກງານ ອາຈານ ແລະບຸກຄົນທົ່ວໄປ.
  • ຫ້າມຂາດການເຂົ້າຮ່ວມກິດຈະກຳຕ່າງໆທີ່ການຈັດຕັ້ງຈັດຂຶ້ນ ແລະທີ່ກ່ຽວຂ້ອງກັບຕົນ.
  • ຫ້າມແຕ່ງກາຍບໍ່ຖືກກົດລະບຽບນັກສຶກສາເຂົ້າສະຖານທີ່ລັດຖະການໃນໂມງການ.

ການຄວບຄຸມການປະພຶດຂອງນັກສຶກສາ

ມາດ​ຕາ 11 :

ນັກສຶກສາ ມຊ.ຜູ້ໜຶ່ງໆມີຄະແນນຄຸນສົມບັດ 300 ຄະແນນຕະຫຼອດໄລຍະສຶກສາຢູ່ ມຊ.

ໃນກໍລະນີນັກສຶກສາຄົນໃດກະທຳຜິດຕໍ່ກົດລະບຽບ, ພາຍຫຼັງມີການຕັກເຕືອນ ແລະ ສຶກສາອົບຮົມແລ້ວ ຈະມີການຕັດຄະແນນຄຸນສົມບັດຕາມຄວາມຜິດໃນສະຖານໜັກ ຫຼື ເບົາ ຕາມແຕ່ລະກໍລະນີ ດັ່ງຕາ ຕະລາງລຸ່ມນີ້:

11.1. ຕາຕະລາງກໍລະນີກະທຳຜິດ ແລະລະດັບການຕັດຄະແນນຄຸນສົມບັດ

ລ/ດ ປະ​ເພດ​ການກະທຳຜິດ ຄະແນນ ຖືກຕັດ ໝາຍເຫດ
1 ຈັດ​ຕັ້ງ​ອົງ​ການ​ໃດ​ໜຶ່ງ ຫຼື ​ຈັດ​ຕັ້ງ​ການ​ຊຸມ​ນຸມ ​ໃດ​ໜຶ່ງ​ຂຶ້ນ​ໂດຍບໍ່​ໄດ້​ຮັບການ ​ອະ​ນຸມັດ. 300  
2 ນຳ​ເອົາ​ອາ​ວຸດ​,ວັດຖຸລະເບີດ,ສານພິດທຸກ​ຊະ​ໜິດ ເຂົ້າມາໃນ ມຊ. 300  
3 ສົມຮູ້ຮ່ວມຄິດ ຫຼື ຊຸກເຊື່ອງເອົາ​ຄົນ​ປະ​ເພດ​ໂຕນ​ຄຸກທີ່ເຈົ້າ​ໜ້າ​ທີ່​ພວມ​ນຳ​ຈັບ, ປະ​ເພດ​ໂສເພ​ນີ, ນັກ​ເລງ​ອັນ​ຕະ​ພານເຂົ້າ​ມາ ໃນ​ ມຊ. 300  
4 ອາລະວາດ ຫຼື ສ້າງຄວາມບໍ່ສະຫງົບໃນ ມຊ ຫຼື ຢູ່ແຫ່ງອື່ນໆ 250-300  
5 ທຳ​ລາຍ, ປອມ​ແປງ​ລາຍ​ເຊັນ ຫຼື ເອກະສານ ທາງການ. 250-300  
6 ເສບ ຊື້ ຂາຍ ຜະລິດ ຫຼືມີ​ສິ່ງເສບ​ຕິດໄວ້​ໃນ ຄອບ​ຄອງ 200-300  
7 ນຳໃຊ້ ຫຼືເຜີຍແຜ່ອຸປະກອນສື່ລາມົກຕ່າງໆ 200-300  
8 ພົວພັນເພດກົງກັນຂ້າມທີ່ຜິດຮີດຄອງປະເພນີຂອງລາວ 200-300  
9 ຕີກັນ ຫຼືທຳຮ້າຍຮ່າງກາຍກັນຈົນໄດ້ຮັບບາດເຈັບ 150-300  
10 ທຳລາຍຊັບສິນສ່ວນລວມ ຫຼື ສວນບຸກຄົນ ມູນຄ່າ 10.000 ກີບ ຂຶ້ນໄປ 150-300 ພ້ອມທັງ ໄຊ້ແທນ
11 ຂາດຮຽນໂດຍບໍ່ມີເຫດຜົນ ຫຼື ບໍ່ມີເອກະສານ ຢັ້ງຢືນຖືກຕ້ອງພາຍໃນ 30 ວັນ ຕໍ່ເນື່ອງຂຶ້ນໄປ ຫຼືທຸດຈະລິດໃນການຮຽນ ການກວດກາແລະສອບເສັງ 150-300  
12 ຫຼິ້ນການພະນັນໃນຂອບເຂດ ມຊ ຫຼືມີສ່ວນ ພົວພັນກັບຄະດີການພະນັນ ຢູ່ແຫ່ງອື່ນ. 150-275  
13 ລັກໂລບສິ່ງຂອງສ່ວນລວມ ຫຼື ຂອງຜູ້ອື່ນ ມູນຄ່າ 10,000 ຂຶ້ນໄປມາ ເປັນຂອງສ່ວນຕົວ 150-275 ພ້ອມທັງ ໄຊ້ແທນ
14 ດື່ມສິ່ງມຶນເມົາແລະອາລະວາດສ້າງຄວາມ ເສຍຫາຍ 100-275 ພ້ອມທັງ ໄຊ້ແທນ
15 ລ່ວງລ້ຳສະຖານທີ່ລັດຖະການ ຫຼືລັກຄົ້ນເອກະສານທາງການ. 100-150  
16 ນຸ່ງເຄື່ອງແບບນັກສຶກສາໄປເຄື່ອນໄຫວໃນສະຖານທີ່ບັນເທີງ ແລະ ສະຖານ ທີ່ບໍ່ເໝາະສົມອື່ນໆ. 50-100 ຫລັງຈາກ ຕັກເຕືອນ
17 ນຳໃຊ້ບັດນັກສຶກສາໄປໃນທາງທີ່ບໍ່ເໝາະສົມ 50-100 ຫລັງຈາກ ຕັກເຕືອນ
18 ໃສ່​ຕຸ້ມ​ຫູ ຫຼືື ຈົ່ງ​ຜົມ​ຍາວ (ຊາຍ),ຍ້ອມສີຜົມ, ໃສ່ປອກແຄ່ງ (ທັງຍິງແລະຊາຍ) 50-100 ຫລັງຈາກ ຕັກເຕືອນ
19 ສ້າງຄວາມເປື້ອນເປິະໃສ່ສະຖານທີ່ສາທາລະນະຕ່າງໆ. 20-100 ຫລັງຈາກ ຕັກເຕືອນ
20 ວົນແຊວຫຼືືໃຊ້ເຄື່ອງມືສື່ສານເຊິ່ງເປັນການລົບກວນການຮຽນຫຼືການເຮັດ ວຽກທາງລັດຖະການ. 20-50 ຫລັງຈາກ ຕັກເຕືອນ
21 ສູບຢາ, ກິນອາຫານດຶ່ມເຄື່ອງດຶ່ມຕ່າງໆໃນເວລາຮຽນ, ເວລາປະຊຸມ, ເຂົ້າຫ້ອງສະໝຸດແລະຢູ່ ຕາມບໍລິເວນຫວງຫ້າມ. 20-50 ຫລັງຈາກ ຕັກເຕືອນ
22 ໃຊ້ວາຈາ ຫຼື ທ່າທີບໍ່ສຸພາບຕໍ່ພະນັກງານ ອາຈານ ແລະ ຜູ້ອື່ນໆ. 10-80 ຫລັງຈາກ ຕັກເຕືອນ
23 ບໍ່ເຂົ້າຮ່ວມການອອກແຮງງານ ຫຼືບໍ່ເຂົ້າຮ່ວມ ກິດຈະກຳອື່ນໆທີ່ການຈັດຕັ້ງ ຈັດຂຶ້ນທີ່ກ່ຽວຂ້ອງກັບຕົນເອງ 10-50 ຫລັງຈາກ ຕັກເຕືອນ
24 ແຕ່ງກາຍບໍ່ຖືກລະບຽບຂອງນັກສຶກສາໃນສະຖານທີ່ລັດຖະການໃນໂມງ ລັດຖະການ. 10-50 ຫລັງຈາກ ຕັກເຕືອນ

11.2. ການ​ກະ​ທຳ​ຜິດ​ທີ່​ບໍ່​ໄດ້​ກຳ​ນົດ​ໄວ້​ໃນ ຂໍ້ 11.1. ໃຫ້​ອິງ​ຕາມ​ລະບຽບກົດໝາຍບ້ານເມືອງ ຫຼື ກົດລະບຽບ​ສະ​ເພາະຂອງພາກສ່ວນກ່ຽວຂ້ອງທີ່ນັກສຶກສາໄດ້ມີການກະທຳຜິດຢູ່ທີ່ນັ້ນ ເພື່ອ​ພິ​ຈາ​ລະ​ນາ​ຕັດ​ຄະ​ແນນ​ຄຸນສົມບັດ.

11.3. ການ​ຕີລາຄາຄຸນສົມບັດ ແລະມາດຕະການທາງວິໄນໃຫ້​ປະ​ຕິ​ບັດ​ຕາມ​ຕາ​ຕະ​ລາງລຸ່ມນີ້:

ຄະ​ແນນ ​ຖືກ​ຕັດ ມາດຕະການທາງວິໄນ
10 -​ 100 ຖືກຕັກ​ເຕືອນຈາກອາຈານປະຈຳຫ້ອງ ຫຼືອາຈານທີ່ປຶກສາຫຼືຫວົໜ້າພະແນກຄຸ້ມຄອງນັກສຶກສາ.
101 -​ 150 ຖືກ​ຕັກ​ເຕືອນ​ຈາກຫົວໜ້າພາກວິຊາພ້ອມທັງແຈ້ງໃຫ້ຜູ້ປົກຄອງຮັບຮູ້.
151 -​ 200 ໃຫ້ຂຽນໃບສຳຫຼວດໄວ້ພະແນກຄຸ້ມຄອງນັກສຶກສາ ແລະ ແຈ້ງໃຫ້ຜູ້ປົກຄອງຮັບຮູ້.
201 -​ 250 ຖືກຕັກເຕືອນຈາກຄະນະບໍດີ ຫຼື ຜູ້ອຳນວຍການແລະໃຫ້ຜູ້ປົກຄອງ ມາຂຽນໃບຄ້ຳປະກັນ ການປະພຶດ.
251 -​ 300 ລົບລ້າງຜົນການຮຽນໝົດພາກຮຽນ ຫຼື ໝົດສົກຮຽນ.
300 ຂຶ້ນໄປ ໝົດສະຖານະພາບການເປັນນັກສຶກສາ ມຊ ຫຼື ໂຈະ ຫຼື ລົບລ້າງສິດຮັບປະກາສະນິຍະບັດ (ສຳລັບນັກສຶກສາປີສຸດທ້າຍທີ່ກຽມຮັບປະກາສະນິຍະບັດ).

11.4. ວິ​ທີ ແລະຂັ້ນ​ຕອນໃນ​ການ​ຕັດ​ຄະ​ແນນ​ຄຸນສົມບັດຂອງ​ນັກ​ສຶກ​ສາ :

11.4.1. ອາ​ຈານ​ສອນ, ພະ​ນັກ​ງານ ທຸກ​ຄົນ​ໃນ​ພາກວິ​ຊາ ແລະຄະ​ນະວິຊາ​ລ້ວນ​ແຕ່​ມີ​ສິດ ແນະ​ນຳຕັກ​ເຕືອນ, ແລະຄວບ​ຄຸມ​ການປະ​ພຶດ​ຂອງ​ນັກ​ສຶກ​ສາ​ໃນ​ຄະນະ​​ວິຊາຂອງ​ຕົນ.

11.4.2. ຂັ້ນ​ຕອນ​ການ​ຕັດ​ຄະ​ແນນ​ຄຸນສົມບັດຂອງ​ນັກ​ສຶກ​ສາ​ປະ​ຕິ​ບັດ​ຄື:

ກ. ອາ​ຈານພະ​ນັກ​ງານທີ່​ເຫັນ​ການ​ປະ​ພຶດ​ຂອງ​ນັກ​ສຶກ​ສາມີໜ້າທ່ີລາຍງານການ ກະທຳຜິດຂອງນັກສຶກສາໃຫ້ພະແນກຄຸ້ມຄອງນັກສຶກສາແຕ່ລະພາກສ່ວນ ຫຼືຜູ້ທ່ີຖືກມອບໝາຍ ເພື່ອໃຫ້ ປະສານສົມທົບກັບໜ່ວຍປ້ອງກັນ ຫຼືພາກສ່ວນກ່ຽວຂ້ອງດຳເນີນການສືບສວນ, ບັນທຶກເຫດການທີ່ເກີດ ຂຶ້ນແລ້ວສົ່ງໃຫ້ພະແນກຄຸ້ມຄອງນັກສຶກສາ ເພື່ອນຳເຂົ້າພິຈາລະນາໃນກອງປະຊຸມຄະນະກຳມະການ ຍ້ອງຍໍ ແລະວິໄນຂອງຄະນະວິຊາທີ່ຈະຈັດຂຶ້ນຕາມ​ເວລາທີ່​ເໝາະ​ສົມ.

ຂ. ໃນກໍລະນີການຕັດຄະແນນຄຸນສົມບັດຕ່ຳກວ່າ 300 ຄະແນນ ແມ່ນໃຫ້ຄະນະບໍດີ ຂອງ ຄະນະວິຊານັ້ນໆ ເປັນຜູ້ເຊັນການປະຕິບັດວິໄນ ແຕ່ຖ້າການຕັດຄະແນນຄຸນສົມບັດເຖິງ 300 ຄະແນນ ຂຶ້ນເມືອ ແມ່ນໃຫ້ລາຍງານຫາອະທິການບໍດີ ເພື່ອຕັດສິນການປະຕິບັດວິໄນ.

ຄ. ໃນທຸກທ້າຍ​ສົກ​ຮຽນ, ພະແນກຄຸ້ມຄອງນັກ​ສຶກ​ສາ ຕ້ອງສະ​ຫຼຸບຄະແນນ ຄຸນສົມບັດ ຂອງນັກສຶກສາແຕ່ລະຄົນ ສົ່ງໃຫ້ພະແນກວິຊາການ ບັນທຶກຈົດເຂົ້າໃນໃບລວມຄະແນນ ປະຈຳປີຂອງນັກສຶກສາ ແຕ່ລະຄົນແລ້ວແຈ້ງໃຫ້ນັກສຶກສາຊາບ ພ້ອມກັບການແຈ້ງຜົນການຮຽນປະຈຳປີ ຂອງນັກສຶກສາ.

ການ​ລາ​ພັກ ແລະການ​ສິ້ນ​ສຸດ​ສະ​ຖາ​ນະ​ພາບການ​ເປັນ​ນັກ​ສຶກ​ສາ​ ມຊ.

ມາດ​ຕາ12:

ໃນ​ໄລຍະທີ່ພວມມີການການສອນ ແລະການຮຽນຢູ່, ຖ້ານັກສຶກສາມີຄວາມຕ້ອງການ ລາພັກ, ຜູ້ກ່ຽວຕ້ອງຂຽນຄຳຮ້ອງສະເໜີຕໍ່ການຈັດຕັ້ງ. ຖ້າເຈັບເປັນຕ້ອງມີໃບຢັ້ງຢືນຈາກແພດ, ຖ້າມີ ຄວາມຂັດສົນອື່ນໆຕ້ອງມີການຢັ້ງຢືນຈາກຜູ້ປົກຄອງແລະອຳນາດການປົກຄອງທ້ອງຖິ່ນ. ການພິຈາ ລະນາ ລາພັກໃນແຕ່ລະກໍລະນີໃຫ້ປະຕິບັດດັ່ງນີ້:

  • 1-2 ວັນ ແມ່ນອາຈານປະຈຳຫ້ອງ ຫຼືອາຈານປະຈຳຊັ້ນເປັນຜູ້ອະນຸຍາດ.
  • 3-7 ວັນ ແມ່ນທ່ານຫົວໜ້າພາກວິຊາຂອງຄະນະວິຊາຫຼື ພະແນກວິຊາການເປັນຜູ້ອະນຸຍາດ.
  • 8-30 ວັນແມ່ນທ່ານຄະນະບໍດີ ເປັນຜູ້ອະນຸຍາດ.
  • ເກີນ 30 ວັນຂຶ້ນເມືອ ແມ່ນ​ທ່ານອະ​ທິ​ການ​ບໍ​ດີ​ເປັນ​ຜູ້​ອະ​ນຸ​ຍາດໂດຍ​ຜ່ານຄະນະວິຊາ ທີ່ກ່ຽວຂ້ອງ

ມາດ​ຕາ 13:

ສະ​ຖາ​ນະ​ພາບ​ເປັນ​ນັກ​ສຶກສາ​ຂອງ​ນັກ​ສຶກ​ສາ​ ມຊ.ຈະ​ສິ້ນ​ສຸດ​ລົງ​ໃນ​ກໍ​ລະ​ນີ​ຕ່າງໆຕໍ່​ໄປ​ນີ້:

  • ເສຍຊີວິດ.
  • ເປັນພະຍາດຕິດແປດທີ່ຮ້າຍແຮງ ຫຼື ເປັນບ້າໃບ້ເສຍຈິດ.
  • ໄດ້​ຮັບ​ອະ​ນຸ​ຍາດ​ໃຫ້ລາ​ອອກ​.
  • ຍ້າຍ​ໄປ​ຮຽນຢູ່​ສະ​ຖາ​ບັນ​ການ​ສຶກ​ສາ​ອື່ນຢູ່​ພາຍ​ໃນ ຫຼືຕ່າງ​ປະ​ເທດ.
  • ຖືກ​ຕັດສະຖານະພາບ​ເປັນ​ນັກ​ສຶກ​ສາ​ ມຊ.
  • ຮຽນຈົບ ແລະໄດ້ຮັບປະກາສະນິຍະບັດແລ້ວ.
  • ຮຽນບໍ່ຈົບຕາມເນື້ອໃນຫຼັກສູດຫຼືກຳນົດເວລາທີ່ທາງວິຊາການ ມຊ.ໄດ້ກຳນົດໄວ້

ການ​ຍ້ອງ​ຍໍ ແລະ ປະຕິບັດວິໄນ

ມາດ​ຕາ 14 :

ນັກ​ສຶກ​ສາ​ ມຊ. ທຸກ​ຄົນ​ທີ່ຮຽນ​ເກັ່ງ, ມີ​ຜົນງານ​ດີ​ເດັ່ນ ແລະເປັນແບບຢ່າງທີ່ດີ ໃນການ ປະ​ຕິ​ບັດມະຕິຄຳສັ່ງ ແລະຂໍ້​ກຳ​ນົດກົດລະ​ບຽບ​ຕ່າງໆຂອງ​ການຈັດຕັ້ງລະດັບຕ່າງໆຂອງ ມຊ.ຈະ​ໄດ້​ຮັບ​ການ​ພິ​ຈາ​ລະ​ນາ​ຍ້ອງ​ຍໍ​ຈາກ​ການ​ຈັດ​ຕັ້ງ​ທີ່​ກ່ຽວ​ຂ້ອງ​ຂອງ​ ມຊ ​ດ້ວຍ​ຮູບ​ການ​ໃດ​ໜຶ່ງ​ທີ່​ເໝາະ​ສົມດັ່ງ​ຕໍ່​ໄປນີ້

14.1 ຕິດ​ຊື່ ແລະຮູບ​ລົງ​ຜະນັງໃຫ້ກຽດຫຼືກະດານຂ່າວ​ຂອງ​ພາກວິ​ຊາ,

14.2 ໄດ້ຮັບລາງວັນ​ເປັນ​ວັດ​ຖຸ ແລະ ນະໂຍບາຍອື່ນໆທີ່ເໝາະສົມ.

14.3 ໄດ້ຮັບໃບ​ຍ້ອງ​ຍໍ​ຈາກ​ຄະ​ນະວິຊາ, ອະ​ທິການບໍ​ດີ, ລັດຖະມົນຕີ ແລະລັດ​ຖະ​ບານ​ຕາມ​ລຳ​ດັບ.

14.4 ໄດ້​ຮັບ​ປະກາສະນິ​ຍະ​ບັດ​ກຽດ​ນິຍົມເມື່ອສຳເລັດການສຶກສາ.

14.5 ຈາ​ລຶກ​ຊື່ໄວ້​​ໃນ​ປຶ້ມປະຫວັດສາດຂອງ​ມະ​ຫາ​ວິ​ທະ​ຍາ​ໄລ​ແຫ່ງ​ຊາດ.

ມາດ​ຕາ15 :

ນັກ​ສຶກ​ສາ​ ມຊ ທຸກ​ຄົນ​ທີ່​ປະ​ພຶດ​ຕົນ​ບໍ່​ດີ, ກະທຳຜິດຕໍ່​ກົດ​ລະບຽບ, ຂໍ້​ກຳ​ນົດ​ຕ່າງໆ​ຂອງ ມຊ ຫຼືກະທຳ​ຜິດ​ລະ​ບຽບ​ກົດ​ໝາຍ ແລະຮີດ​ຄອງ​ປະ​ເພ​ນີ, ລ້ວນ​ແຕ່​ຈະຖືກ​​ປະ​ຕິ​ບັດ​ວິ​ໄນດ້ວຍຮູບການ​ໃດ​ໜຶ່ງຕາມແຕ່ລະກໍລະນີ​ ດັ່ງ​ຕໍ່​ໄປ​ນີ້:

15.1 ຖືກຕັກເຕືອນ​

15.2 ຂຽນໃບສຳຫຼວດພ້ອມທັງຖືກຕັດຄະແນນ

15.3 ລົບລ້າງຜົນການຮຽນໜຶ່ງພາກຮຽນ ຫຼື ໜຶ່ງສົກຮຽນຕາມຄວາມເໝາະສົມ.

15.4 ໂຈະຫຼືລົບ​ລ້າງ​ຜົນ​ການ​ສອບ​ເສັງຫຼືໂຈະຫຼືຕັດສິດການຮັບປະກາສະນິຍະບັດ

15.5 ຕັດ​ສະ​ຖາ​ນະ​ພາບ​ເປັນ​ນັກ​ສຶກ​ສາ​ ມຊ.

15.6 ຕັດ​ສະ​ຖາ​ນະ​ພາບ​ເປັນ​ນັກ​ສຶກ​ສາ​ ມຊ ພ້ອມທັງປະ​ກອບ​ສຳ​ນວນ​ຟ້ອງ​ສານ.

ມາດ​ຕາ 16 :

ການ​ຍ້ອງ​ຍໍ ຫຼື ປະ​ຕິ​ບັ​ດ​ວິ​ໄນຕໍ່ນັກ​ສຶກ​ສາ​ແຕ່​ລະ​ຄັ້ງ​ ຕ້ອງ​ຜ່ານ​ການ​ພິ​ຈາ​ລະ​ນາ​ຈາກ​ຄະນະ​​ ກຳ​ມະ​ການ​ຍ້ອງ​ຍໍ-ວິ​ໄນຂອງ​ ມຊ ​ຊຶ່ງ​ມີ 2 ລະ​ດັບ ຄື :

16.1. ຄະ​ນະ​ກຳ​ມະ​ການ​ຍ້ອງ​ຍໍ-​ວິ​ໄນຂອງ​ສູນ, ຄະນະວິຊາ ​ມີ​ໜ້າ​ທີ່​ ຄົ້ນ​ຄວ້າ​ການ​ຍ້ອງ​ຍໍ ແລະປະ​ຕິ​ບັດ​ວິ​ໄນ​ນັກ​ສຶກ​ສາ​ໃນ​ພາກສ່ວນ​ຕົນ;ຄະ​ນະ​ກຳ​ມະ​ການດັ່ງກ່າວປະ​ກອບ​ ໂດຍຕຳແໜ່ງດັ່ງ ຕໍ່ໄປນີ້:

16.1.1. ຄະ​ນະ​ບໍ​ດີ, ຜູ້​ອຳ​ນວຍ​ການ ຫຼື​ ຜູ້​ຖືກມອບ​ໝາຍ​ ເປັນ​ປະ​ທານ.

16.1.2. ບັນ​ດາ​ຮອງ​ຄະ​ນະ​ບໍ​ດີ, ຮອງ​ຜູ້​ອຳ​ນວຍ​ການ ເປັນ​ຮອງ​ປະ​ທານ.

16.1.3. ຫົວໜ້າພາກວິ​ຊາແລ​ະ​ບັນ​ດາ​​ຫົວ​ໜ້າພະແນກ​ທີ່​ກ່ຽວຂ້ອງ​ເປັນ​ກຳ​ມະ​ການ ໃນນັ້ນ, ຫົວ​ໜ້າພະແນກຄຸ້ມຄອງນັກ​ສຶກ​ສາ​ເປັນ​ເລ​ຂາ​ນຸການ.

16.1.4. ຕົວ​ແທນ​ຂອງ​ອົງ​ການ​ຈັດ​ຕັ້ງ​ມະ​ຫາ​ຊົນ ​ ແລະ ຕົວແທນການຈັດຕັ້ງ ນັກສຶກສາຂອງ​ຄະນະວິຊາເປັນ​ກຳ​ມະ​ການ.

16.2. ຄະ​ນະ​ກຳ​ມະ​ການ​ຍ້ອງ​ຍໍ-​ວິ​ໄນ​ຂັ້ນ​ ມຊ ​ມີ​ໜ້າ​ທີ່​ພິ​ຈາ​ລະ​ນາຄຳ​ຕັດ​ສິນ​ຂອງ​ຄະ​ນະ​ກຳ​ມະ​ການ​ຍ້ອງ​ຍໍ-​ວິ​ໄນ​ຂອງ​ຄະ​ນະ​ວິ​ຊາ ເພື່ອຕົກລົງຍ້ອງຍໍ ຫຼືປະຕິບັດວິໄນລະດັບສູງສຸດ ຂອງ ມຊ. ຄະ​ນະ​ກຳ​ມະ​ການ​ດັ່ງ​ກ່າວ​ປະ​ກອບ​ໂດຍຕຳແໜ່ງດັ່ງຕໍ່ໄປນີ້:

1. ອະ​ທິ​ການ​ບໍ​ດີ ຫຼື ຜູ້​ຖືກມອບ​ໝາຍ​ ເປັນ​ປະ​ທານ.

2. ບັນ​ດາ​​ຮອງ​ອະ​ທິ​ການ​ບໍ​ດີ ​ ເປັນ​ຮອງ​ປະ​ທານ.

3. ​ຄະ​ນະ​ບໍ​ດີ ຫຼື ຮອງ ​ທີ່​ກ່ຽວ​ຂ້ອງ ​ເປັນ​ກຳ​ມະ​ການ.

4. ບັນ​ດາ​ຫົວ​ໜ້າ​ຫ້ອງ​ການ​ທີ່​ກ່ຽວ​ຂ້ອງ ເປັນ​ກຳ​ມະ​ການ.

5. ​ຕົວ​ແທນ​ອົງ​ການ​ຈັດ​ຕັ້ງ​ມະ​ຫາ​ຊົນ​ຂັ້ນ​ ມຊ ເປັນ​ກຳ​ມະ​ການ.

6. ຫົວໜ້າພະແນກລະບຽບວິໄນຂອງຫ້ອງການ ເປັນເລຂານຸການ.

ມາດ​ຕາ 17:

ການແບ່ງຂັ້ນໃນ​ການ​ຍ້ອງຍໍ ແລະປະຕິບັດວິໄນຕໍ່ນັກ​ສຶກ​ສາ ໃຫ້ປະຕິບັດດັ່ງນີ້:

17.1. ການ​ຍ້ອງ​ຍໍ​ລະ​ດັບ​ຄະ​ນະ​ວິຊາ ລົງ​ໄປ​ແມ່ນ​​ຄະ​ນະ​ບໍ​ດີ ລົງ​ລາຍ​ເຊັນຕົກລົງ ແລະ ລາຍ​ງານ​ໃຫ້​ອະ​ທິ​ການ​ບໍ​ດີ​ຮັບຮູ້​ ໃນ​ເວ​ລາ​ ອັນ​ຄວນ. ສ່ວນການຍ້ອງຍໍລະດັບມະຫາວິທະຍາໄລ ແຫ່ງຊາດ ແມ່ນອະທິການບໍດີເປັນຜູ້ຕົກລົງໂດຍໄດ້ຮັບການສະເໜີຈາກຄະນະບໍດີທີ່ກ່ຽວຂ້ອງ.

17.2. ການ​ປະ​ຕິ​ບັດ​ວິ​ໄນ​ລະ​ດັບ​​ກ່າວ​ເຕືອນ​ຄວາມ​ຜິດ, ຂ​ຽນໃບ​ສຳ​ຫຼວດ​ຕົວ​ເອງ ແລະ ແຈ້ງ​ໃຫ້ຜູ້​ປົກ​ຄອງ​ຮັບຮູ້ແລະມີການຕັດຄະແນນຄຸນສົມບັດຕ່ຳກວ່າ 300 ຄະແນນ ແມ່ນທ່ານ​ຄະນະ​ບໍ​ດີ​ ​ເປັນ​ຜູ້​ລົງ​ລາຍ​ເຊັນ​ການຕົກລົງ ຫລັງຈາກຜ່ານການເຫັນດີຂອງຄະນະກຳມະການຍ້ອງຍໍ ແລະ ວິໄນ ຂອງຄະນະວິຊາແລ້ວລາຍ​ງານ​ໃຫ້​ອະ​ທິ​ການ​ບໍ​ດີ​ຮັບຮູ້​ໃນ​ເວ​ລາ​ອັນ​ຄວນ.

17.3. ສ່ວນການປະຕິບັດວິໄນເຖິງຂັ້ນຕັດຄະແນນຄຸນສົມບັດຮອດ 300 ຄະແນນ ແມ່ນ ອະ​ທິ​ການ​ບໍ​ດີເປັນຜູ້ຕົກລົງພາຍຫລັງຜ່ານການເຫັນດີຈາກຄະນະກຳມະການຍ້ອງຍໍ ແລະວິໄນຂັ້ນ ມຊ. ແລະໄດ້ຮັບການສະເໜີຈາກຫ້ອງການຄຸ້ມຄອງນັກສຶກສາ.

17.4. ໃນກໍລະນີນັກສຶກສາມີສ່ວນພົວພັນກັບຄະດີອາຍາ ຫຼື ຖືກກັກຕົວແຕ່ບໍ່ທັນໄດ້ຮັບ ການຕັດສິນລົງໂທດ ນັກສຶກສາຜູ້ນັ້ນຈະຖືກຕັດສິດການຮຽນ ຫຼື ໃຫ້ໂຈະການຮຽນຈົນກວ່າຈະມີຄຳຕັດ ສິນຈາກສານວ່າບໍ່ມີຄວາມຜິດຈຶ່ງໃຫ້ສືບຕໍ່ຮຽນໄດ້, ຖ້າຫາກຄຳຕັດສິນວ່າມີຄວາມຜິດແທ້ກໍຈະຖືກ ພິຈາລະນາຕັດຄະແນນຕາມລະບຽບການ.

ງານແຂ່ງຂັນເວົ້າພາສາຈີນຄັ້ງທີ 12 ໃນຫົວຂໍ້ “ຄວາມຝັນເປັນແສງສະຫວ່າງໃນອະນາຄົດ”

ງານແຂ່ງຂັນເວົ້າພາສາຈີນຄັ້ງທີ 12 ໃນຫົວຂໍ້ “ຄວາມຝັນເປັນແສງສະຫວ່າງໃນອະນາຄົດ”

CVIMG 4313

ອ່ານເພີ່ມເຕີມ: ງານແຂ່ງຂັນເວົ້າພາສາຈີນຄັ້ງທີ 12 ໃນຫົວຂໍ້ “ຄວາມຝັນເປັນແສງສະຫວ່າງໃນອະນາຄົດ”

ທ່ານກຳລັງຢູ່ທີ່: Home ນັກສຶກສາ ນັກສຶກສາ ກົດລະບຽບຂອງນັກສຶກສາມະຫາວິທະຍາໄລແຫ່ງຊາດ

ການຮັບສະໝັກ

ທຶນການສຶກສາ